💥BREAKING NEWS💥 बुलढाणा सामान्य रुग्णालयाच्या गार्ड वॉर्डातून पोलिसांना गुंगारा देऊन आरोपी फरार; शहर पोलिसांत गुन्हा दाखल

0 305 1 minute read

लोकप्रिय मराठी न्यूज नेटवर्क

बुलढाणा: येथील शासकीय सामान्य रुग्णालयातील कैदी वार्ड (गार्ड वॉर्ड क्र. ८) मधून उपचारासाठी दाखल असलेला आरोपी पोलिसांच्या हातावर तुरी देऊन पसार झाल्याची धक्कादायक घटना उघडकीस आली आहे. या प्रकरणी बुलढाणा शहर पोलीस ठाण्यात संबंधित आरोपीविरुद्ध गुन्हा नोंदवण्यात आला आहे.

विष्णू भगवान तायडे (वय ६० वर्षे, रा. संभाजी नगर, चिखली, जि. बुलढाणा) असे फरार झालेल्या आरोपीचे नाव आहे.

मिळालेल्या माहितीनुसार, बुलढाणा जिल्हा सामान्य रुग्णालयातील वॉर्ड क्रमांक ८ मध्ये इतर एका आरोपीवर उपचार सुरू असल्याने पोलीस कर्मचारी ड्युटीवर तैनात होते. दरम्यान, आरोपी विष्णू तायडे यालाही उपचारासाठी २७ ऑक्टोबर रोजी याच वॉर्डात दाखल करण्यात आले होते. गुरुवार, २९ ऑक्टोबर रोजी सकाळी सुमारे पावणे सात वाजेच्या (०६:४०) सुमारास आरोपी विष्णू तायडे याने वॉर्डातून पळून जाण्याचा प्रयत्न केला.

तेथे कर्तव्यावर असलेले पोलीस उपनिरीक्षक (GPSI) बाबुराव नथ्थूराव हुडेकर व पोलीस कर्मचाऱ्यांनी त्याला अडवण्याचा प्रयत्न केला. मात्र, पोलिसांचे न ऐकता तो तेथून पसार झाला. पोलिसांनी तात्काळ त्याचा पाठलाग केला, परंतु तो हाती लागला नाही. त्यानंतर रुग्णालय परिसर, चिखली येथील त्याचे राहते घर तसेच नातेवाईकांकडे कसून शोध घेण्यात आला; मात्र आरोपीचा कोणताही सुगावा लागला नाही.

या प्रकरणी पोलीस उपनिरीक्षक बाबुराव हुडेकर यांच्या तक्रारीवरून बुलढाणा शहर पोलीस ठाण्यात आरोपी विष्णू तायडेविरुद्ध भारतीय न्याय संहिता (BNS) कलम २६२ अन्वये गुन्हा दाखल करण्यात आला आहे. घटनेचा पुढील तपास पोलीस हेड कॉन्स्टेबल प्रकाश बाजड करत आहेत. भर रुग्णालयातून आरोपी पसार झाल्याने पोलीस वर्तुळात मोठी खळबळ उडाली आहे.