बुलढाणा जिल्ह्यात काँग्रेसच्या ‘संघटन सृजन’ अभियानाचा श्रीगणेशा!; कार्यकर्ते आणि पदाधिकाऱ्यांच्या संवादातून निवडला जाणार नवा जिल्हाध्यक्ष; पारदर्शक नियुक्तीवर भर
लोकप्रिय मराठी न्यूज नेटवर्क
बुलढाणा: अखिल भारतीय काँग्रेस कमिटीने संघटना तळागाळापर्यंत आणि बुथ स्तरापर्यंत मजबूत करण्यासाठी ‘संघटन सृजन अभियान’ हाती घेतले आहे. महाराष्ट्रातही या अभियानाची सुरुवात झाली असून, बुलढाणा जिल्ह्यात शनिवार, ४ एप्रिल रोजी या अभियानाचा औपचारिक प्रारंभ झाला. या अभियानांतर्गत जिल्हाभरातील काँग्रेस कार्यकर्ते आणि पदाधिकाऱ्यांशी थेट संवाद साधून नवीन जिल्हाध्यक्षाची निवड केली जाणार असल्याची माहिती अभियानाचे समन्वयक अब्दुलजी हनान यांनी दिली.
बुलढाणा येथील जिल्हा काँग्रेस कमिटीच्या कार्यालयात आयोजित पत्रकार परिषदेत अब्दुलजी हनान बोलत होते. यावेळी काँग्रेसचे विद्यमान जिल्हाध्यक्ष राहुलभाऊ बोंद्रे, सह-समन्वयक विरेंद्रजी जगताप, प्रशांतजी पचाडे, ऐश्वरीताई राठोड यांची प्रमुख उपस्थिती होती.
अब्दुलजी हनान यांनी सांगितले की, हे अभियान आतापर्यंत देशातील २० राज्यांमध्ये यशस्वीपणे राबविण्यात आले आहे. बुथ स्तरापासून ते राज्य स्तरापर्यंत पक्षाला सशक्त करणे, समर्पित कार्यकर्त्यांना सक्षम करणे आणि जबाबदाऱ्यांचे पारदर्शकपणे वाटप करणे ही या अभियानाची मुख्य उद्दिष्टे आहेत. विशेषतः महिला आणि युवकांना पक्ष संघटनेत मोठ्या प्रमाणावर स्थान दिले जाणार आहे. जिल्हाध्यक्ष पदासाठी इच्छुक उमेदवारांना तीन पानांचा अर्ज भरावा लागणार असून, त्यातून ६ नावांची शिफारस प्रदेश काँग्रेसकडे केली जाईल.
राहुल बोंद्रेंची मोठी घोषणा: “जिल्हाध्यक्ष पदाचा अर्ज भरणार नाही”
यावेळी बोलताना विद्यमान जिल्हाध्यक्ष राहुलभाऊ बोंद्रे यांनी एक महत्त्वपूर्ण घोषणा केली. ते म्हणाले, “गेल्या १२ वर्षांपासून मला काँग्रेसचा जिल्हाध्यक्ष म्हणून काम करण्याची संधी मिळाली. या काळात पक्षासाठी भरपूर काम केले. मात्र, आता नवीन चेहऱ्याला संधी मिळावी, या उद्देशाने मी यावेळेस जिल्हाध्यक्ष पदासाठी अर्ज भरणार नाही.” आगामी काळातही पक्षवाढीसाठी अहोरात्र झटणार असल्याचे त्यांनी स्पष्ट केले. त्यांच्या या भूमिकेमुळे जिल्ह्यात नव्या नेतृत्वाचा मार्ग मोकळा झाला आहे.
जिल्ह्यातील अभियानाचा असा असेल पहिला टप्पा:
अभियानाचे समन्वयक जिल्ह्यातील विविध ब्लॉकमध्ये बैठका घेऊन मार्गदर्शन करणार आहेत:
५ एप्रिल (रविवार): चिखली, देऊळगाव राजा आणि लोणार येथे बैठका.
६ एप्रिल (सोमवार): मेहकर आणि खामगाव येथे ब्लॉक काँग्रेसच्या बैठका.
७ एप्रिल (मंगळवार): शेगाव, नांदुरा आणि मलकापूर येथे समन्वयकांची उपस्थिती.
या अभियानामुळे जिल्ह्यातील काँग्रेस कार्यकर्त्यांमध्ये नवा उत्साह संचारला असून, आगामी निवडणुकांच्या पार्श्वभूमीवर पक्ष संघटना मजबूत करण्यावर भर दिला जात आहे.
