💥BREAKING NEWS💥 तलवारीने वाढदिवसाचा केक कापून रिल्स व्हायरल करणाऱ्या तरुणाला अटक, तरुणावर आर्म्स ॲक्टनुसार गुन्हा दाखल; दहशत माजवणाऱ्यांवर बारीक लक्ष- ठाणेदार संग्राम पाटील

0 3 1 minute read

लोकप्रिय मराठी न्यूज नेटवर्क

बुलढाणा: आपल्या वाढदिवसाचा केक तलवारीसारख्या धारदार शस्त्राने कापून त्याचा व्हिडिओ (रिल्स) सोशल मीडियावर व्हायरल करणे एका २० वर्षीय तरुणाला चांगलेच अंगलट आले आहे. परिसरात दहशत पसरवण्याच्या उद्देशाने रिल्स पोस्ट करणाऱ्या या तरुणाला बुलढाणा शहर पोलिसांनी अटक करून, त्याच्याकडून ४१ सेमी लांबीचे धारदार शस्त्र जप्त करण्यात आले आहे.

ओम गजानन काकडे (वय २०, रा. वॉटर हाऊसजवळ, सागवण, जि. बुलढाणा) असे गुन्हा दाखल झालेल्या तरुण आरोपी तरुणाचे नाव आहे.

बुलढाणा जिल्हा सायबर सेलच्या सोशल मीडिया मॉनिटरिंग पथकाला इन्स्टाग्रामवर एका खात्यावरून धारदार शस्त्राने केक कापल्याचा व्हिडिओ (रिल्स) व्हायरल झाल्याचे आढळले. या व्हिडिओद्वारे दहशत पसरवण्याचा प्रयत्न होत असल्याचे स्पष्ट झाल्यानंतर सायबर सेलने तांत्रिक विश्लेषण केले. तपासात हे खाते सागवण येथील ओम काकडे याचे असल्याचे निष्पन्न झाले.

माहिती मिळताच बुलढाणा शहर पोलीस ठाण्याचे ठाणेदार संग्राम पाटील यांच्या मार्गदर्शनाखाली सहायक पोलीस उपनिरीक्षक निकम, पोलीस हवालदार नागरे, कायंदे आणि पोलीस कॉन्स्टेबल शिवहरी सांगळे यांच्या पथकाने पंचांसह सागवण येथील वॉटर हाऊस परिसरात छापा टाकला. दुपारी १:४० वाजेच्या सुमारास पोलिसांनी संशयित ओम काकडे याला ताब्यात घेतले.

सुरुवातीला त्याने उडवाउडवीची उत्तरे दिली; मात्र पोलिसांनी पोलीस ठाण्यात आणून पंचांसमक्ष पोलिसी खाक्या दाखवताच त्याने शस्त्र घरात लपवून ठेवल्याची कबुली दिली. पोलिसांनी घरातून ४१ सेमी एकूण लांबी असलेले (पाते ३० सेमी आणि मूठ ११ सेमी) धारदार शस्त्र जप्त केले. याप्रकरणी आरोपीविरुद्ध भारतीय शस्त्र कायदा (आर्म्स ॲक्ट) कलम ४, २५ अन्वये गुन्हा नोंदवण्यात आला असून पुढील तपास सुरू आहे.दरम्यान आरोपी तरुणाची न्यायालयाने जमिनीवर सुटका केली आहेत.

“सोशल मीडियावर शस्त्रे किंवा गुन्हेगारी वृत्तीचे प्रदर्शन करून दहशत माजवणाऱ्यांवर सायबर सेलचे चोवीस तास बारीक लक्ष आहे. अशा समाजकंटकांवर कठोर कायदेशीर कारवाई केली जाईल.”अशी माहिती बुलढाणा शहराचे ठाणेदार संग्राम पाटील यांनी दिली आहेत.