💥घाटबोरी वनक्षेत्रात ५३ लाखांच्या सागवान वृक्षांची अवैध तोड; दोन तस्करांना अटक, वनपाल व वनरक्षक निलंबित💥

लोकप्रिय मराठी न्युज नेटवर्क

​बुलडाणा: बुलडाणा वनविभागांतर्गत येणाऱ्या घाटबोरी परिक्षेत्रातील भोसा नियतक्षेत्र कक्ष क्रमांक १८१ मध्ये सागवान वृक्षांची मोठ्या प्रमाणावर अवैध तोड झाल्याचा प्रकार उघडकीस आला आहे. या प्रकरणात वनविभागाने दोन प्रमुख आरोपींना अटक केली असून, निष्पक्ष तपासासाठी स्थानिक वनपाल व वनरक्षकाला निलंबित करण्यात आले आहे. या संपूर्ण कारवाईत वृक्षतोडीसाठी वापरण्यात आलेली जेसीबी, हायड्रासह ३५ लाख रुपयांची वाहने व साधने जप्त करण्यात आली आहेत.

दिनांक २ ऑक्टोबर रोजी भोसा नियतक्षेत्रात नियमित गस्तीदरम्यान वनकर्मचाऱ्यांना १०३ झाडांचे बुंधे (थुटे) तोडलेल्या अवस्थेत आढळले. यावरून तत्काळ वनअपराध पहिले प्रतिवृत्त (POR) नोंदवून तपास अधिकारी तथा वनपरिक्षेत्र अधिकारी अंकुश येवले यांनी तपास चक्रे फिरवली. याप्रकरणी मुख्य संशयित राहुल रामदास मेहेत्रे (रा. लोणी गवळी, ता. मेहकर) याला अटक करण्यात आली. न्यायालयाने त्याला २ दिवसांची वनकोठडी सुनावली.

प्रकरणाचे गांभीर्य ओळखून उपवनसंरक्षक जमीर शेख यांच्या आदेशानुसार वनपरिक्षेत्र अधिकारी (संरक्षण) किशोर पडोळ यांच्या पथकाने परिसराची सखोल तपासणी केली. त्यांच्या तपासात समोर आले की, वनक्षेत्र कक्ष क्र. १८१: १४५ सागवान वृक्षांची तोड (६४.९६० घनमीटर), ज्याची बाजारभावाप्रमाणे किंमत ३५ लाख २६ हजार ४४९ रुपये आहे. घटनास्थळावरून ८.८६ घनमीटर सागवान (किंमत ३.३५ लाख) जप्त करण्यात आला.

​लगतचे ई-क्लास महसूल क्षेत्र: ७६ सागवान वृक्षांची तोड (३९.६५३ घनमीटर), ज्याची किंमत १७ लाख ९८ हजार २६१ रुपये आहे. याठिकाणाहून १.८ घनमीटर सागवान (किंमत १.२७ लाख) जप्त करण्यात आला. एकूण २२१ वृक्षांची कत्तल करून सुमारे ५३ लाख २४ हजार रुपयांचे नुकसान केल्याचे निष्पन्न झाले.

​-नागपूरपर्यंत रॅकेटची पाळेमुळे; ३५ लाखांची यंत्रसामग्री जप्त-

प्रकरणाचे गांभीर्य लक्षात घेऊन तपास सहाय्यक वनसंरक्षक वैभव काकडे यांच्याकडे सोपवण्यात आला. तपासादरम्यान गुन्ह्यात वापरलेली जेसीबी, टेम्पो ४०७, हायड्रा, ट्रॅक्टर, कटर मशीन व कुऱ्हाडी असा एकूण ३५ लाख रुपयांचा मुद्देमाल जप्त करण्यात आला.

​मजुरांच्या चौकशीतून भारत महादेव तिवाले (रा. दुर्गबोरी) याचे नाव समोर आल्यानंतर त्याला अटक करून न्यायालयाने ५ दिवसांची वनकोठडी मंजूर केली. आरोपी हे जुलै महिन्यापासून ही तोड करत असून, लाकूड ट्रकमधून नागपूरला नेऊन आडत दलालामार्फत विकले जात असल्याचे स्पष्ट झाले. यावरून नागपूर येथील लाकूड आडतदारालाही चौकशीसाठी ताब्यात घेण्यात आले आहे. आरोपींनी यापूर्वीही सरकारी व आदिवासींच्या जमिनीवरील झाडे विनापरवाना तोडल्याची माहिती समोर आली आहे.

-​उच्चस्तरीय समिती गठीत; पोलिसांतही गुन्हा दाखल-

मुख्य वनसंरक्षक (प्रा.) अमरावती श्रीमती ज्योती बॅनर्जी यांनी या प्रकरणाची सखोल चौकशी करण्यासाठी विभागीय वन अधिकारी (दक्षता) अमरावती कमलेश पाटील यांच्या अध्यक्षतेखाली चौकशी समिती नेमली आहे. ही समिती वनकर्मचाऱ्यांचा सहभाग व इतर आरोपींची कसून चौकशी करून अहवाल सादर करणार आहे. तसेच ई-क्लास जमिनीवरील तोडीबाबत महसूल विभागातर्फे डोणगाव पोलीस ठाण्यात स्वतंत्र तक्रार दाखल करण्यात आली आहे.

​ही कारवाई मुख्य वनसंरक्षक ज्योती बॅनर्जी, उपवनसंरक्षक जमीर शेख यांच्या मार्गदर्शनाखाली सहाय्यक वनसंरक्षक वैभव काकडे, वनपरिक्षेत्र अधिकारी किशोर पडोळ, आर. आर. सातपुते व वनकर्मचाऱ्यांनी पार पाडली.

​”बुलडाणा जिल्ह्यात शासकीय ई-क्लास जमिनीवर व आदिवासी खासऱ्यावरील विनापरवाना वृक्षतोड सुरू असल्याचे या प्रकरणावरून समोर आले आहे. या संपूर्ण प्रकरणाची सखोल चौकशी करून सविस्तर अहवाल जिल्हाधिकाऱ्यांना सादर केला जाईल. दोषी आढळणाऱ्या कोणाचीही गय केली जाणार नसून त्यांच्यावर कठोर कारवाई केली जाईल. नागरिकांनी अशा अवैध तोडीबाबत तत्काळ वनविभागाला माहिती द्यावी.”असे आवाहन  बुलढाणा उपवनसंरक्षक जमीर शेख, यांनी केले आहे.