💥BREAKING NEWS💥 खरीप पिकांसाठी आरक्षित पाण्याव्यतिरिक्त शिल्लक पाणी देण्यास प्रशासन सकारात्मक; टप्प्याटप्प्याने पाणी सोडणार; केंद्रीय राज्यमंत्री प्रतापराव जाधव यांच्या पुढाकारातून शेतकऱ्यांना दिलासा

लोकप्रिय मराठी न्युज नेटवर्क

​बुलढाणा: जिल्ह्यातील विविध प्रकल्पांमधील उपलब्ध जलसाठ्याचे सूक्ष्म नियोजन करून, भविष्यातील पाणीटंचाईसाठी आरक्षित ठेवण्यात येणाऱ्या पाण्याव्यतिरिक्त शिल्लक पाणी खरीप पिकांना सिंचनासाठी देण्यास जिल्हा प्रशासनाने सकारात्मक भूमिका घेतली आहे. केंद्रीय आयुष व आरोग्य राज्यमंत्री प्रतापराव जाधव यांच्या पुढाकारामुळे हा मार्ग मोकळा झाला असून, यामुळे संकटात सापडलेल्या शेतकऱ्यांच्या खरीप पिकांना आणि जनावरांच्या चाऱ्याला मोठा आधार मिळणार आहे.

​यंदा जिल्ह्यात झालेल्या अपुऱ्या पावसामुळे अनेक भागांतील खरीप पिकांना मोठा फटका बसला आहे. पाण्याअभावी शेतातील उभी पिके वाळू लागली असून, शेतकऱ्यांचा उत्पादन खर्चही निघणे कठीण झाले आहे. अशा नाजूक परिस्थितीत तूर, कपाशी आणि हळद या पिकांना किमान एक वेळ पाणी मिळाल्यास पिके तग धरतील, अशी मागणी शेतकऱ्यांनी केंद्रीय राज्यमंत्री प्रतापराव जाधव यांच्याकडे केली होती.

​शेतकऱ्यांची ही अडचण ओळखून ना. प्रतापराव जाधव यांनी जिल्हाधिकारी डॉ. प्रविणकुमार देवरे यांच्यासह संबंधित विभागाच्या वरिष्ठ अधिकाऱ्यांची तातडीची आढावा बैठक घेतली. प्रकल्पांमधील सद्यस्थितीतील पाणीसाठा, पिण्याच्या पाण्याची भविष्यातील गरज आणि बाष्पीभवनामुळे होणारी घट विचारात घेऊन नियोजन करण्याचे निर्देश त्यांनी दिले. पिण्याच्या पाण्यासाठी आवश्यक साठा आणि १० टक्के अतिरिक्त साठा सुरक्षित ठेवून उर्वरित पाणी शेतीसाठी वापरण्याबाबत चाचपणी करण्याच्या सूचना त्यांनी दिल्या होत्या.

​प्रशासनाने तातडीने सर्वेक्षण करून सूक्ष्म नियोजन पूर्ण केले. पिण्याच्या पाण्याचा साठा सुरक्षित ठेवूनही शिल्लक पाण्याद्वारे खरीप पिकांना सिंचन देणे शक्य असल्याचे या सर्वेक्षणातून स्पष्ट झाले आहे. त्यानुसार तूर, कपाशी, हळद आणि चाऱ्यासाठी प्रकल्पांमधून टप्प्याटप्प्याने पाणी सोडण्याचा निर्णय प्रशासनाने घेतला आहे.

​-पाण्याचा काटकसरीने वापर करण्याचे आवाहन-

प्रकल्पांमधून सोडण्यात येणाऱ्या पाण्याचा शेतकऱ्यांनी अत्यंत नियोजनपूर्वक आणि काटकसरीने वापर करावा. हे पाणी केवळ सध्याच्या संकटातील खरीप पिके आणि पशुधनाच्या चाऱ्यासाठीच असून, रब्बी हंगामातील पिकांसाठी याचा वापर करू नये, असे आवाहन ना. प्रतापराव जाधव यांनी केले आहे. या निर्णयामुळे ऐन संकटाच्या काळात शेतकऱ्यांना मोठा दिलासा मिळाला आहे.