बुलढाणा येथे जमियत अहले हदीस व IGC तर्फे रक्तदान शिबीर..
लोकप्रिय मराठी न्युज नेटवर्क
बुलढाणा: शहरातील गवळीपुरा येथील ‘जमियत अहले हदीस’ आणि ‘इस्लामिक गार्डन्स सेंटर’ (IGC) यांच्या संयुक्त विद्यमाने मोहम्मदी मस्जिदमध्ये ११ ऑगस्ट रोजी रक्तदान शिबिराचे आयोजन करण्यात आले होते. सामाजिक बांधीलकी जपणाऱ्या या उपक्रमात संकलित झालेले रक्त ‘जीवनधारा बुलढाणा अर्बन ब्लड सेंटर’ला सुपूर्द करण्यात आले.
रक्तदान करून गरजू व आजारी व्यक्तींचे प्राण वाचवणे हे मानवतेचे उत्तम उदाहरण असून, सेवाभाव हाच प्रत्येक धर्माचा खरा संदेश असल्याचे या प्रसंगी उपस्थितांनी व्यक्त केले.
या कार्यक्रमाला सेवानिवृत्त उपविभागीय पोलीस अधिकारी दिलीप तडवी, जमियत अहले हदीसचे ज्येष्ठ सदस्य शेख रहीम बाबू, जिल्हा प्रमुख मिनहाज खान, नदीम खान, डॉ. शिफायत, डॉ. कमर आणि IGC चे उमेर देशमुख आदी मान्यवर प्रमुख पाहुणे म्हणून उपस्थित होते.
आपल्या मनोगतात बोलताना सेवानिवृत्त DySP दिलीप तडवी म्हणाले, “आजच्या वातावरणात असा उपक्रम राबवणे अत्यंत कौतुकास्पद आहे. यामुळे समाजात मानवतेचा संदेश तर जाईलच, शिवाय देशात बंधुभाव व सलोख्याचे वातावरण निर्माण होण्यास मदत होईल.”
रक्तदानाचे आरोग्यदायी फायदे
जमियत अहले हदीसचे जिल्हा प्रमुख मिनहाज खान यांनी रक्तदानाचे महत्त्व पटवून देताना सांगितले की, “रक्तदान केल्याने आरोग्याला कोणतीही हानी होत नाही. मानवी रक्त हा असा घटक आहे जो कृत्रिमरित्या बनवता येत नाही. मोठ्या शस्त्रक्रिया आणि अपघातांमध्ये रुग्णांचे प्राण वाचवण्यासाठी रक्ताची नितांत गरज असते. नियमित रक्तदान करणाऱ्यांचे आरोग्य उत्तम राहते, असे अनेक संशोधनांतून समोर आले आहे.”
वर्षभर सामाजिक व मदतकार्य
IGC चे उमेर देशमुख यांनी संस्थेमार्फत चालवल्या जाणाऱ्या विविध उपक्रमांची माहिती दिली की, राशन किट वाटप: शहरातील ९० गरीब, गरजू व विधवा महिलांच्या कुटुंबांना दरमहा नित्योपयोगी वस्तूंचे राशन किट दिले जाते.
मोहम्मदी दस्तरखान: गोरगरीब व गरजूंसाठी मोफत आणि शुद्ध शाकाहारी दोन्ही वेळच्या जेवणाची सोय करण्यात आली आहे.
शैक्षणिक व वैद्यकीय मदत: गरजू विद्यार्थ्यांना मोफत गणवेश, पुस्तके, वह्या तसेच रुग्णांना मोफत औषधोपचार पुरवले जातात.
जलसेवा (पाणपोई): ‘पाणी हेच जीवन’ या उदात्त भावनेतून बुलढाणा बस स्थानक, चिखली स्टॉप, बाजार लाईन आणि टिपू सुलतान चौक येथे नागरिकांसाठी शुद्ध मिनरल वॉटरच्या पाणपोयी उभारण्यात आल्या आहेत.
हा कार्यक्रम यशस्वी करण्यासाठी जमियत अहले हदीस, अव्वामी बैतुल माल आणि आय.जी.सी. (IGC) च्या सर्व कार्यकर्त्यांनी सहभाग नोंदवून परिश्रम घेतले.
