मलकापुरात भाजपमध्ये अंतर्गत संघर्ष उफाळला; आमदार चैनसूख संचेती यांच्यावर स्वपक्षीय उमेदवाराचा गद्दारीचा गंभीर आरोप
लोकप्रिय मराठी न्यूज नेटवर्क
बुलढाणा: बुलढाणा जिल्हा मध्यवर्ती सहकारी बँकेच्या निवडणुकीच्या निमित्ताने मलकापूर मतदारसंघात भाजप विरुद्ध भाजप असा तीव्र अंतर्गत संघर्ष समोर आला आहे. सत्ताधारी राष्ट्रवादी (अजित पवार गट) पुरस्कृत परिवर्तन पॅनलमधून विजयी झालेले भाजप नेते शिवचंद्र तायडे यांनी भाजप आमदार चैनसूख संचेती यांच्यावर स्वपक्षीय उमेदवाराला पाडण्याचा प्रयत्न केल्याचा सनसनाटी आणि गंभीर आरोप केला आहे.
विजयी उमेदवार शिवचंद्र तायडे यांनी प्रसारमाध्यमांशी बोलताना सांगितले की, या निवडणुकीत आमदार संचेती यांनी मला पराभूत करण्यासाठी आटोकाट प्रयत्न केले. सुरवातीला आमदार संचेती यांनी भाजपकडून ज्ञानदेव वाघोदे यांची उमेदवारी पुढे केली होती. त्यावेळी, “जर भाजपला वाघोदे यांनाच उभे करायचे असेल तर मी माघार घेतो,” अशी भूमिका तायडे यांनी मांडली होती. तरीही आमदार संचेती यांनी वाघोदे यांची पेटी बंद करून (उमेदवारी मागे घ्यायला लावून/निष्क्रिय करून) थेट विरोधक असलेल्या शरद पवार गटाच्या सहकार पॅनलचे उमेदवार संतोष रायपुरे यांना छुप्या पद्धतीने मदत केली, असा खळबळजनक दावा तायडे यांनी केला.
पक्षाध्यक्षांकडे तक्रार करणार
आमदार संचेती यांनी पक्षाच्या अधिकृत उमेदवाराशी आणि भूमिकेशी गद्दारी करत पक्षविरोधी कारवाई केली आहे. याप्रकरणी आपण शांत बसणार नसून भाजप प्रदेशाध्यक्ष आणि उपमुख्यमंत्री देवेंद्र फडणवीस यांच्याकडे आमदार चैनसूख संचेती यांची तक्रार नोंदवणार असल्याचे तायडे यांनी स्पष्ट केले.
जिल्हा बँकेच्या निवडणुकीतील या नाट्यमय घडामोडींमुळे राजकीय वर्तुळात मोठी खळबळ उडाली असून मलकापूर भाजपमधील गटबाजी आता चव्हाट्यावर आली आहे.
