केंद्र व राज्य सरकारच्या धोरणांविरोधात बुलढाण्यात काँग्रेसचा ‘आसूड मोर्चा’; हजारो शेतकरी व कार्यकर्त्यांचा एल्गार
लोकप्रिय मराठी न्यूज नेटवर्क
बुलढाणा: केंद्र आणि राज्य सरकारच्या नाकर्तेपणाविरोधात आणि चुकीच्या धोरणांविरोधात आज सोमवारी बुलढाणा शहरात काँग्रेसच्या वतीने एक भव्य आणि विराट ‘आसूड मोर्चा’ काढण्यात आला. ‘नीट’ परीक्षांमधील पेपरफुटी, गगनला भिडलेली इंधन दरवाढ आणि खतांच्या वाढत्या किमती यांमुळे त्रस्त झालेले हजारो शेतकरी, कष्टकरी आणि विद्यार्थी या मोर्च्याच्या माध्यमातून रस्त्यावर उतरले होते. काँग्रेसचे प्रदेशाध्यक्ष हर्षवर्धन सपकाळ आणि नवनियुक्त जिल्हाध्यक्ष प्रकाश अवचार पाटील यांच्या नेतृत्वाखाली निघालेल्या या मोर्च्याने संपूर्ण बुलढाणा शहर दणाणून सोडले.
बुलढाणा जिल्हा काँग्रेस कमिटीच्या वतीने आयोजित हा मोर्चा स्थानिक गर्दे हॉल येथून सुरू झाला. त्यानंतर कारंजा चौक, जनता चौक, बाजार लाईन आणि जयस्तंभ चौक असा मार्गक्रमण करत मोर्चा थेट जिल्हाधिकारी कार्यालयावर धडकला. मोर्च्यादरम्यान आंदोलकांनी केंद्र आणि राज्य सरकारच्या धोरणांविरोधात गगनभेदी घोषणाबाजी करत परिसर दणाणून सोडला होता.
अभिनव आंदोलनाने वेधले लक्ष
या मोर्च्यामध्ये सरकारच्या जनविरोधी धोरणांचा निषेध करण्यासाठी कार्यकर्त्यांनी अत्यंत अभिनव पद्धतींचा वापर केला, ज्यांनी सर्वांचेच लक्ष वेधून घेतले.
पेट्रोलचे दर परवडत नसल्याने चक्क हातगाडीवर दुचाकी ठेवून ती ओढण्यात आली.
डिझेलच्या महागाईचा निषेध म्हणून ट्रॅक्टरला बैल बांधून तो ओढण्यात आला.
याशिवाय, गाढवांवर निषेधाचे फलक लावून सरकारच्या कारभाराची धिंड काढण्यात आली.
पंतप्रधान नरेंद्र मोदी यांच्या इटली दौऱ्यादरम्यानच्या भेटीचा संदर्भ देत ‘मेलोडी चॉकलेट’ची करण्यात आलेली टोमणेबाजी देखील या मोर्च्यात विशेष चर्चेचा विषय ठरली.
”केंद्र आणि राज्य सरकारच्या चुकीच्या धोरणांमुळे आज शेतकरी, विद्यार्थी आणि सामान्य जनता होरपळून निघत आहे. या नाकर्त्या सरकारला जागे करण्यासाठीच आज हा आसूड ओढण्यात आला आहे.”
जिल्हाधिकाऱ्यांना निवेदन सादर
या विराट मोर्च्यात हजारो शेतकरी आपल्या पारंपारिक वेशभूषेत सहभागी झाले होते. जिल्हाधिकारी कार्यालयासमोर मोर्चा पोहोचल्यानंतर, काँग्रेसच्या एका प्रमुख शिष्टमंडळाने जिल्हाधिकाऱ्यांची भेट घेऊन त्यांना आपल्या विविध मागण्यांचे निवेदन सादर केले. या आंदोलनात काँग्रेस आमदार धीरज लिंगाडे, माजी आमदार राहुलभाऊ बोंद्रे, माजी आमदार राजेश एकडे, लक्ष्मणराव धुमरे, श्यामभाऊ उमाळकर, हरीश रावळ, धनंजय देशमुख, हाजी रशीद खा जमादार, स्वामीताई वाडेकर, मंगलाताई पाटील यांच्यासह जिल्ह्यातील असंख्य काँग्रेस पदाधिकारी, कार्यकर्ते आणि नागरिक मोठ्या संख्येने उपस्थित होते. या मोर्च्याच्या निमित्ताने बुलढाण्यात विद्यार्थी, शेतकरी आणि सर्वसामान्यांच्या मनातील असंतोषाचा मोठा उद्रेक पाहायला मिळाला.
