💥वेदनेवर फुंकर घालणारा ‘गुलाबराव’ नावाचा सुगंध!💥; बुलढाणा जिल्हा परिषदेचे कर्तव्यदक्ष मुख्य कार्यकारी अधिकारी गुलाबराव खरात यांचा कार्यकाळ ठरला ऐतिहासिक; बदलीने नागरिकांमध्ये हळहळ

लोकप्रिय मराठी 2 weeks ago

0 95 1 minute read

लोकप्रिय मराठी न्युज नेटवर्क

बुलढाणा: प्रशासकीय खुर्चीवर बसून सामान्य माणसाच्या दुःखावर फुंकर घालणारे, कर्तव्याला माणुसकीची जोड देणारे बुलढाणा जिल्हा परिषदेचे मुख्य कार्यकारी अधिकारी गुलाबराव खरात यांची नुकतीच बदली झाली. अवघ्या दोन वर्षे दोन महिन्यांच्या अल्पावधीत आपल्या पारदर्शक, निस्पृह आणि संवेदनशील कार्यशैलीने त्यांनी संपूर्ण जिल्ह्याला आपल्या आपलेपणाची भुरळ घातली. त्यांच्या तडकाफडकी बदलीमुळे प्रशासकीय वर्तुळासह सामान्य जनतेच्या मनाला मोठा चटका बसला असून, जिल्ह्यात हळहळ व्यक्त होत आहे.

सर्वसाधारणपणे सनदी अथवा प्रशासकीय अधिकाऱ्यांवर स्तुतीसुमने उधळली जात नाहीत; विशेषतः बदली झाल्यानंतर तर अशी उदाहरणे अपवादानेच पाहायला मिळतात. मात्र, गुलाबराव खरात यांनी आपल्या प्रत्यक्ष कृतीतून आणि मातीशी घट्ट नाळ जोडून या समजाला पूर्णपणे छेद दिला. ग्रामीण भागातील दारिद्र्य, विद्यार्थ्यांची परिस्थिती आणि कर्मचाऱ्यांच्या अडीअडचणींची सखोल जाण ठेवून त्यांनी प्रत्येक घटकाला न्याय देण्याचा प्रामाणिक प्रयत्न केला. निस्वार्थ भाव आणि सदैव मदतीची वृत्ती यामुळे ते अल्पावधीतच जनसामान्यांचे ‘आपले सीईओ’ बनले.

गुलाबराव खरात यांची प्रशासकीय पकड आणि नियमांचे काटेकोर पालन किती अचूक होते, याचे ताजे उदाहरण नुकतेच उच्च न्यायालयातील एका खटल्यात समोर आले. राज्यभरातील जिल्हा परिषदांच्या मुख्य कार्यकारी अधिकाऱ्यांवर सुरू असलेल्या न्यायालयीन प्रकरणात इतर अनेक अधिकाऱ्यांना दंडात्मक कारवाईला सामोरे जावे लागले असताना, केवळ बुलढाणा जिल्हा परिषदेचे मुख्य कार्यकारी अधिकारी गुलाबराव खरात यांनाच उच्च न्यायालयाकडून दिलासा (Relief) मिळाला. कागदपत्रांची अचूकता, कायदेशीर बाजूंची जाण आणि कर्तव्यनिष्ठ कामकाज यामुळेच हा विजय शक्य झाला होता.

केवळ रुक्ष फायली निकाली काढणे म्हणजेच प्रशासन नव्हे, तर शेवटच्या घटकाचे कल्याण करणे हे ब्रीद त्यांनी प्रत्यक्ष जगले. आपल्या सव्वादोन वर्षांच्या कार्यकाळात त्यांनी ग्रामीण भागातील गुणवंत विद्यार्थ्यांना प्रगतीची नवी दारे उघडून दिली, तर प्रामाणिकपणे काम करणाऱ्या कर्मचाऱ्यांना हक्काचे व्यासपीठ मिळवून दिले. अनेक होतकरू तरुणांच्या आयुष्याला दिशा देण्याचे काम त्यांच्या मार्गदर्शनाखाली झाले.

मुदतपूर्व एक्झिटने हळहळ

अजून किमान आठ ते नऊ महिन्यांचा प्रशासकीय कार्यकाळ शिल्लक असताना त्यांची झालेली अनपेक्षित बदली सर्वांच्याच जिव्हारी लागणारी ठरली आहे. मातृतीर्थ बुलढाणा जिल्ह्याला लाभलेला हा कर्तव्यदक्ष आणि संवेदनशील अधिकारी निरोप घेत असला, तरी त्यांनी प्रशासनात पेरलेली माणुसकीची मूल्ये आणि केलेली विकासकामे बुलढाणेकर सदैव स्मरणात ठेवतील, अशा भावना व्यक्त होत आहेत.