आत्ता हुकलं तरी राज्यपाल कोट्याच ‘पुढचं’ नक्की! राणा दिलीपकुमार सानंदांना पक्षश्रेष्ठींचा शब्द; जिशान सिद्दिकींना अजितदादांच्या राष्ट्रवादीची उमेदवारी
लोकप्रिय मराठी न्यूज नेटवर्क
बुलढाणा: विधानपरिषदेच्या १० रिक्त जागांसाठी होत असलेल्या निवडणुकीच्या पार्श्वभूमीवर राजकीय घडामोडींना वेग आला आहे. बुलढाणा जिल्ह्यातून अजितदादा पवार यांच्या राष्ट्रवादी काँग्रेसचे नेते राणा दिलीपकुमार सानंदा यांचे नाव चर्चेत होते. मात्र, ताज्या घडामोडींनुसार सानंदा यांना या निवडणुकीत ‘वेट अँड वॉच’ची भूमिका घ्यावी लागणार असून, आगामी राज्यपाल नियुक्त आमदारांच्या यादीत त्यांना संधी दिली जाईल, असा शब्द पक्षश्रेष्ठींनी दिल्याची माहिती खात्रीलायक सूत्रांकडून मिळाली आहे.
अजित पवार यांच्या नेतृत्वाखालील राष्ट्रवादी काँग्रेसने आपल्या कोट्यातील एका जागेसाठी बाबा सिद्दिकी यांचे चिरंजीव जिशान सिद्दिकी यांच्या नावाची अधिकृत घोषणा केली आहे. राणा सानंदा यांनी अजितदादांच्या नेतृत्वावर विश्वास ठेवून आपल्या हजारो समर्थकांसह पक्षात प्रवेश केला होता. त्यामुळे त्यांना विधानपरिषदेची उमेदवारी मिळेल अशी दाट शक्यता वर्तवली जात होती. मात्र, आता त्यांना राज्यपाल नियुक्त कोट्यातून विधानपरिषदेवर पाठवले जाणार असल्याचे समजते.
महायुती आणि महाविकास आघाडीचे रणशिंग
आज ३० एप्रिल रोजी उमेदवारी अर्ज भरण्याचा शेवटचा दिवस असल्याने सर्वच पक्षांनी आपली रणनीती स्पष्ट केली आहे. १० जागांसाठी होणाऱ्या या निवडणुकीत महायुतीचे पारडे जड दिसत आहे.
पक्षनिहाय उमेदवारांची स्थिती:
भाजप (६ जागा): सुनील कर्जतकर, माधवी नाईक, संजय भेंडे, विवेक कोल्हे, प्रमोद जठार आणि डॉ. प्रज्ञा सातव (पोटनिवडणूक).
शिवसेना (शिंदे गट – २ जागा): डॉ. नीलम गोऱ्हे आणि बच्चू कडू.
राष्ट्रवादी (अजित पवार गट – १ जागा): जिशान सिद्दिकी.
शिवसेना (ठाकरे गट – १ जागा): अंबाजी दानवे.
निवडणुकीचे वेळापत्रक:
उमेदवारी अर्ज भरण्याची अंतिम मुदत: ३० एप्रिल (आज दुपारी ३ वाजेपर्यंत).
अर्जांची छाननी: २ मे २०२६.
अर्ज मागे घेण्याची मुदत: ४ मे २०२६.
मतदान आणि निकाल: १२ मे २०२६.
अंबाजी दानवे यांच्या उमेदवारीमुळे महाविकास आघाडीत काही प्रमाणात नाराजीचे सूर उमटत असतानाच, दुसरीकडे सानंदा यांना दिलेल्या शब्दामुळे बुलढाणा जिल्ह्याला भविष्यात विधानपरिषदेचे प्रतिनिधित्व मिळणार का? याकडे सर्वांचे लक्ष लागले आहे. १२ मे रोजी होणाऱ्या मतदानानंतरच या राजकीय गणितांचे चित्र पूर्णपणे स्पष्ट होईल.
