लोकप्रिय मराठी न्यूज नेटवर्क

​मुंबई: उपमुख्यमंत्री अजित पवार यांच्या विमान अपघाताच्या प्रकरणाला आता मोठे वळण मिळाले आहे. महाराष्ट्रात गुन्हा दाखल होण्यास विलंब होत असल्याचे पाहून, आमदार रोहित पवार यांनी कर्नाटकच्या बेंगळुरू येथील हाय ग्राऊंड पोलीस ठाण्यात धाव घेतली असून, तिथे या प्रकरणाचा पहिला ‘झिरो FIR’ नोंदवण्यात आला आहे. या ६६ पानांच्या सविस्तर तक्रारीत हा केवळ अपघात नसून एक मोठे ‘गुन्हेगारी षडयंत्र’ असल्याचा खळबळजनक दावा करण्यात आला आहे.

​तक्रारीतील ५ मुख्य मुद्दे:

​१. कलम १०३ आणि ६१ चा वापर: भारतीय न्याय संहितेच्या (BNS) गंभीर कलमांखाली हा गुन्हा नोंदवण्यात आला आहे, ज्यात हत्येचा प्रयत्न आणि षडयंत्राचा समावेश आहे.

२. विमान कंपनीवर संशय: ‘VSR व्हेंचर्स’ या विमान कंपनीच्या कार्यपद्धतीवर प्रश्नचिन्ह उपस्थित केले असून, तांत्रिक बिघाड की घातपात, याची चौकशी करण्याची मागणी केली आहे.

३. DGCA चा अहवाल: संबंधित कंपनीच्या विमानांमध्ये सुरक्षा त्रुटी असल्याचे सांगत DGCA ने यापूर्वीच ४ विमाने ग्राउंड केली होती, ही माहिती तक्रारीत जोडली आहे.

४. वैमानिकाची भूमिका: शेवटच्या क्षणी वैमानिक बदलण्यात आला होता का? आणि त्यामागे कोणाचे आदेश होते, याचा तपास आता होणार आहे.

५. ६६ पानांचा पुरावा: रोहित पवार यांनी विमान प्रवासाचे रेकॉर्ड, कंपनीचे जुने व्यवहार आणि अपघाताच्या वेळची परिस्थिती याचे सविस्तर पुरावे पोलिसांना सादर केले आहेत.

​’झिरो FIR’ म्हणजे काय?

​जेव्हा एखादा गुन्हा घडतो, पण तो नेमका कोणत्या पोलीस स्टेशनच्या हद्दीत येतो हे स्पष्ट नसते, तेव्हा कोणत्याही पोलीस स्टेशनमध्ये ‘झिरो FIR’ नोंदवता येतो. बेंगळुरू पोलिसांनी हा गुन्हा नोंदवून आता तो पुढील तपासासाठी महाराष्ट्र पोलीस महासंचालकांकडे (DGP) वर्ग केला आहे.

​महाराष्ट्रात राजकीय भूकंप!

​महाराष्ट्रात सीआयडी (CID) मार्फत या प्रकरणाचा तपास आधीच सुरू आहे, मात्र आता कर्नाटकात गुन्हा दाखल झाल्याने तपासाची व्याप्ती वाढली आहे. यामुळे राज्यातील राजकारण पुन्हा एकदा तापले असून, हा अपघात होता की घातपात, यावर आता न्यायालयीन आणि पोलीस स्तरावर मोठी लढाई पाहायला मिळणार आहे.