बुलढाणेकर नागरिकांनी मालमत्ता मोजणीसाठी सहकार्य करावे; मुख्याधिकारी गणेश पांडे यांचे आवाहन

लोकप्रिय मराठी न्यूज नेटवर्क

​बुलढाणा: बुलढाणा नगर परिषदेमार्फत शहरातील मालमत्तांच्या नवीन कर आकारणीसाठी फेरमूल्यांकन आणि मोजणीच्या कामाला सुरुवात झाली आहे. तब्बल २४ वर्षांनंतर होत असलेल्या या सर्वेक्षणासाठी नागरिकांनी कर्मचाऱ्यांना सत्य माहिती देऊन सहकार्य करावे, असे आवाहन नगर परिषदेचे मुख्याधिकारी गणेश पांडे यांनी केले आहे.

बुलढाणा ​शहरात २००१ पासून मालमत्तांची अधिकृत मोजणी करण्यात आली नव्हती. आता शासनाच्या आदेशानुसार नगर परिषद हद्दीतील सर्व मालमत्तांचे सर्वेक्षण आणि फेरमूल्यांकन केले जात आहे. हे काम ‘कोलब्रो ग्रुप प्रायव्हेट लिमिटेड’ या संस्थेला देण्यात आले असून, त्यांचे कर्मचारी प्रत्यक्ष जागेवर येऊन मोजमाप, फोटो आणि इतर माहिती संकलित करत आहेत.
​अचूक कर आकारणीसाठी सहकार्य गरजेचे
​मुख्याधिकारी गणेश पांडे यांनी स्पष्ट केले की, ही मोजणी झाल्यामुळे मालमत्तेच्या प्रत्यक्ष स्थितीनुसार कर आकारणी करणे सोयीचे होणार आहे. संस्थेचे कर्मचारी आल्यावर त्यांना वस्तुनिष्ठ आणि सत्य माहिती पुरवावी, जेणेकरून भविष्यातील प्रशासकीय प्रक्रिया सुलभ होईल.
​

नागरिकांनी खालील कागदपत्रे तयार ठेवावीत:

​सर्वेक्षणादरम्यान कर्मचाऱ्यांनी मागणी केल्यास खालील कागदपत्रांच्या छायांकित प्रती उपलब्ध करून देणे आवश्यक आहे:
​मालमत्ता दस्तावेज: मालमत्तेचा उतारा किंवा इतर अधिकृत कागदपत्रे.
​मंजुरी कागदपत्रे: बांधकाम मंजुरीची प्रत आणि इमारत पूर्णत्वाचा दाखला (Completion Certificate).
​भाडेकरूंची माहिती: घरात किंवा गाळ्यात भाडेकरू असल्यास त्यांचे नाव, मासिक भाडे आणि भाड्याने दिल्याचा दिनांक.
​ओळख आणि कर भरणा: घरपट्टी, पाणीपट्टीच्या पावत्या आणि आधार कार्डची मूळ किंवा छायांकित प्रत.
​नगर परिषदेच्या या मोहिमेमुळे शहराच्या नियोजित विकासाला आणि महसूल प्रणालीला शिस्त लागणार असून, नागरिकांनी या शासकीय कामात अडथळा न आणता सक्रिय सहभाग नोंदवावा, असे आवाहन नगर परिषद प्रशासनातर्फे करण्यात आले आहे.