💥BREAKING NEWS💥 बुलढाण्यात अवैध सावकारी व पोलिसांच्या जाचाला कंटाळून २६ वर्षीय तरुणाची आत्महत्या; चिठ्ठीत पोलीस कर्मचाऱ्यासह दोघांची नावे

0 1,349 1 minute read

लोकप्रिय मराठी न्युज नेटवर्क

बुलढाणा: शहरातील इंदिरा नगर भागात राहणाऱ्या २६ वर्षीय तरुणाने अवैध सावकारी, मारहाण आणि पोलिसांच्या कथित दमदाटीला कंटाळून शेतात गळफास घेत आत्महत्या केल्याची धक्कादायक घटना समोर आली आहे. अक्षय दिवाकर दराखे (वय २६, रा. इंदिरा नगर, बुलढाणा) असे मृताचे नाव असून, आत्महत्येपूर्वी त्याने लिहिलेल्या चिठ्ठीत दोघा संशयितांसह एका पोलीस जमादाराचे नाव नमूद केल्याने पोलीस दलात खळबळ उडाली आहे.

मिळालेल्या माहितीनुसार, जांभरुळ परिसरातील एका शेतात आज सकाळी ११ वाजेच्या सुमारास अक्षय दराखे याचा मृतदेह झाडाला दोरीने लटकलेल्या अवस्थेत आढळून आला. घटनेची माहिती मिळताच परिसरात हळहळ व्यक्त होत असून संतप्त प्रतिक्रिया उमटत आहेत.
अक्षयने मृत्यूपूर्वी लिहिलेल्या चिठ्ठीनुसार, काल रविवारी (४ ऑगस्ट) सायंकाळी ५:३० वाजेच्या सुमारास विनोद पवार, आकाश पवार व त्यांच्या साथीदारांनी त्याला बेदम मारहाण केली होती. तसेच त्याच्याकडील विवो कंपनीचा मोबाईल आणि खिशातील ३४ हजार रुपये बळजबरीने काढून घेतले होते. या प्रकरणी अक्षयने बुलढाणा शहर पोलीस ठाण्यात तक्रार दाखल केली होती. हा सर्व प्रकार अवैध सावकारीच्या वादातून घडल्याची चर्चा आहे.

पोलीसाकडून मिळाली दमदाटी?

आज सकाळी अक्षयसह संशयित विनोद पवार व आकाश पवार हे बुलढाणा शहर पोलीस ठाण्यात पोहोचले होते. मात्र, तिथे न्याय मिळण्याऐवजी इंदिरा नगर बीटचे जमादार दत्ता नागरे यांनी, “तू खोटा रिपोर्ट दिला आहेस,” असे म्हणत अक्षयलाच दमदाटी केल्याचा आरोप चिठ्ठीत करण्यात आला आहे. एवढेच नव्हे तर हे प्रकरण आपापसात मिटवण्यासाठी १० हजार रुपयांची मागणी करण्यात आल्याचेही मृतक अक्षयच्या नातेवाईकांचे म्हणणे आहे. मारहाण सहन करूनही पोलिसांकडून न्याय मिळत नसल्याने आणि उलट दबाव टाकला जात असल्याने नैराश्यातून अक्षयने टोकाचे पाऊल उचलल्याचे बोलले जात आहे.

या प्रकरणी मृतदेह उत्तरीय तपासणीसाठी रुग्णालयात पाठवण्यात आला असून, चिठ्ठीच्या आधारे संशयित व्यक्ती आणि संबंधित पोलीस कर्मचाऱ्यावर काय कारवाई होते, याकडे नागरिकांचे लक्ष लागले आहे.