महाराष्ट्रावर शोककळा: बारामतीत विमान कोसळले; उपमुख्यमंत्री अजित पवार यांचे निधन
लोकप्रिय मराठी न्युज नेटवर्क
बारामती: राज्याचे उपमुख्यमंत्री आणि राष्ट्रवादी काँग्रेसचे ज्येष्ठ नेते अजित पवार (६६) यांचे आज सकाळी बारामती विमानतळाजवळ झालेल्या एका भीषण विमान अपघातात दुर्दैवी निधन झाले. मुंबईहून बारामतीकडे येत असताना त्यांचे खाजगी विमान धावपट्टीवर उतरण्यापूर्वीच शेजारील एका शेतात कोसळले. या अपघातात अजित पवार यांच्यासह विमानात असलेल्या एकूण सहा जणांचा मृत्यू झाला असून, नागरी विमान वाहतूक संचालनालयाने (DGCA) या वृत्ताला दुजोरा दिला आहे.
नेमकी घटना काय?
आगामी जिल्हा परिषद आणि पंचायत समिती निवडणुकांच्या प्रचारासाठी अजित पवार आज बारामती दौऱ्यावर होते. सकाळी ८:१० वाजता त्यांनी मुंबईहून बारामतीसाठी उड्डाण केले. सकाळी ८:४५ ते ९:०० च्या सुमारास विमान बारामती विमानतळावर लँडिंग करण्याच्या तयारीत असताना हा अपघात घडला. प्रत्यक्षदर्शींच्या माहितीनुसार, विमान उतरत असताना वैमानिकाचे नियंत्रण सुटले आणि विमान धावपट्टी सोडून जवळच्या शेतात वेगाने कोसळले. कोसळताच विमानाने पेट घेतला आणि काही क्षणातच त्याचे रूपांतर आगीच्या गोळ्यात झाले.
मृतांमध्ये सहा जणांचा समावेश
या दुर्घटनेत अजित पवार यांच्यासह त्यांचे वैयक्तिक सुरक्षा रक्षक, कर्मचारी आणि दोन वैमानिकांचा मृत्यू झाला आहे. घटनास्थळी स्थानिक ग्रामस्थ आणि प्रशासनाने धाव घेतली, मात्र आगीची भीषणता इतकी मोठी होती की कोणालाही वाचवता आले नाही. डीजीसीएने दिलेल्या माहितीनुसार, विमानातील सर्व सहा प्रवाशांचा जागीच मृत्यू झाला आहे.
निवडणुकीच्या प्रचारासाठी दौरा
नुकत्याच झालेल्या महानगरपालिका निवडणुकांमध्ये पुणे आणि पिंपरी-चिंचवडमध्ये पक्षाची कामगिरी निराशाजनक झाली होती. या पार्श्वभूमीवर, जिल्हा परिषद आणि पंचायत समिती निवडणुकांमध्ये पक्षाची ताकद पुन्हा सिद्ध करण्यासाठी अजित पवार यांनी बारामती आणि संपूर्ण पुणे जिल्ह्यावर विशेष लक्ष केंद्रित केले होते. आज बारामती तालुक्यात त्यांच्या एकूण चार जाहीर सभा होणार होत्या. याच सभांच्या नियोजनासाठी ते आज सकाळी मुंबईहून निघाले होते.
अपघाताची माहिती मिळताच राज्यभरातून शोक व्यक्त केला जात आहे. मुख्यमंत्री आणि इतर नेत्यांनी या घटनेवर तीव्र दुःख व्यक्त केले आहे.दरम्यान लोकप्रिय मराठी कडून स्व.अजितदादा पवार यांना भावपूर्ण श्रद्धांजली..
